Дубайн автомашины диллер Rolls-Royce Wraith автомашины гадна талыг болон дотор салоныг могойн арьсаар гоёсон байна.
Rolls-Royce Wraith бүрэн шинэчлэгдэж, гайхалтай загварлаг болсон нь олон хүмүүсийн сонирхлыг татаад байна.
Энэ тансаг хүлгийг Дубайд төвтэй Venuum нэртэй тюнинг компанийн багийнхан урласан юм.
Алдарт влоггер Supercar Blondie-гийн ажиллуулдаг дэлхийн хэмжээний тансаг автомашины дуудлага худалдааны платформ дээр энэхүү машиныг байршуулсан байна.
Wraith-ийн ориг хувилбар нь сүртэй харагддаг ч өргөтгөсөн шавар хаалт болон хажуу талын нэмэлт хормойн ачаар бүр ч илүү сүр бардам, содон харагдаж байна.
Их биений загварыг том хэмжээтэй цагаан обудаар чимсэн нь улам бүр онцгой болгожээ.
Дотор салоны интерьер бүрэн шинэчлэгдсэн
Дотор талын салоныг могойн арьсаар бүрэн чимэглэж өгсөн.
“Энэхүү бүрэн шинэчлэгдсэн, интерьер нь тансаг байдал ба шинэлэг шийдлийг хослуулсан бөгөөд гар аргаар оёсон арьс, онцгой чимэглэлүүд болон орчин үеийн гэрэлтүүлгийн системтэй,” хэмээн Venuum өөрсдийн вэбсайт дээрээ бичжээ.
Сонирхуулахад, Wraith автомашин анхны 6.6 литрийн багтаамжтай V12 хөдөлгүүртэй бөгөөд энэ нь 591 морины хүчтэй дүйцнэ.
Одоогоор энэхүү Rolls-Royce Wraith нь маш цөөн тоогоор худалдаанд гарсан байна.
