Саяхан л төрж байсан үр нь сургуульд орохтой зэрэгцэн эцэг эхчүүдийн толгойд олон бодол эргэлддэг. Ямар сургуульд оруулах вэ? Ямар багшид өгөх вэ? Хаана байвал зүгээр вэ гээд л. Хүүхдээ сургуульд оруулахын тулд зөвхөн нэг биш нэлээд хүчин зүйлсийг судлаж үзэх шаардлагатай байдаг.

1. Сургалтын хөтөлбөр, арга барил

Манай улсад Америк сургалтын хөтөлбөр (US Curriculum) болон Кембриджийн (Cambridge Curriculum) сургалтын хөтөлбөр давамгайлдаг.

Америкийн хөтөлбөр нь сурагчдын өөрсдийнх нь хувийн сонирхолд тулгуурлан өргөн сонголттой хичээлүүдийг санал болгодог. Хичээлийн жилийн  туршид хичээлийн дүн, шалгалт, төсөл гэх мэт олон төрлийн үнэлгээтэй. SAT, ACT зэрэг шалгалтуудтай байдаг бол Кембриджийн хөтөлбөр нь нарийн системчилсэн, академик талруугаа түлхүү чиглэдэг.. Cambridge Primary → Cambridge Lower Secondary → IGCSE → A-Level гэх мэт шатлалуудтай байна. Эдгээр хөтөлбөрийг тусгайлан эрхийг авсан сургуулиуд хэрэгжүүлдэг ба энэ хөтөлбөрт тохируулан багш ажилчиддаа бэлтгэдэг.

Мөн манай улсад IB сургалттай сургууль бий. Энэ нь дэлхий даяар хүлээн зөвшөөрөгдсөн, академик болон хувь хүний хөгжлийг дэмжсэн боловсролын систем юм.

IB сургалтын систем нь: 

✅ PYP (Primary Years Programme) – 3-12 нас (Бага анги)
✅ MYP (Middle Years Programme) – 11-16 нас (Дунд анги)
✅ DP (Diploma Programme) – 16-19 нас (Ахлах анги) гэсэн шатлалтай байдаг. 

Эдгээрээс гадна Орос, Хятад болон Монгол улсын “Цөм” сургалтын хөтөлбөртэй сургуулиуд бий. Та эдгээр сургалтын хөтөлбөрүүдээс хүүхдийнхээ хүсэл сонирхолд нийцүүлэн сонголтоо хийх боломжтой.

2. Багш нарын ур чадвар, туршлага

Багш нарын заах арга барил, туршлага, боловсролын түвшин хүүхдийн сурах явцад шууд нөлөөлнө. Сургуулийн багш нар хэр туршлагатай, ямар арга барилаар заадаг, сурагчидтай хэрхэн харилцдаг зэргийг нь тухайн сургуульд суралцаж байсан хүүхдүүд болон эцэг эхээс нь лавлаж болно.

3. Байршил, орчин нөхцөл

Сургуулийн байршил нь хүүхдийн аюулгүй байдал, өдөр тутмын тав тухтай холбоотой. Ойрхон байх тусам хүүхэд замдаа бага ядарна, мөн цаг хэмнэх давуу талтай.. 

Хэрэв та ялангуяа дунд ангийн хүүхэдтэй бол сургуулийн анги танхим, лаборатори, номын сан, спорт заал зэрэг сургалтын орчныг шалгаж сонголтоо хийх нь зөв юм. Учир нь энэ насны хүүхдүүд хичээлээс гадуурх үйл ажиллагаанд хамрагдаж, өөрсдийгөө хөгжүүлэх хүсэлтэй байдаг.

4. Хичээлээс гадуурх үйл ажиллагаа

Хүүхдийн бүтээлч сэтгэлгээ, харилцааны чадвар, биеийн хөгжилд хичээлээс гадуурх үйл ажиллагаа зайлшгүй чухал. Тухайн сургуульд урлаг, спорт, клуб, хөтөлбөрүүд хэр хөгжсөн байгаа эсэхийг судалж үзэх хэрэгтэй. Зарим сургууль урлаг, спортоос гадна STEM хөтөлбөрийг санал болгодог.

5. Сургалтын төлбөр, санхүүгийн боломж

Хувийн болон олон улсын сургуулиудын төлбөр өндөр байх нь элбэг. Тиймээс сургалтын төлбөрөөс гадна нэмэлт зардлууд (ном, хичээлийн хэрэгсэл, аялал, клубийн хураамж г.м.) гардаг эсэхийг сайтар тооцоолох хэрэгтэй. Хэрэв та хол сургуульд өгөх гэж буй бол өдөр бүр гарах унааны зардлаас гадна хүүхэд замдаа хэр ядрах тухай бодолцож үзээрэй. Машинд 1 цагаас илүү түгжрэх нь хувь хүний бүтээмжийг бууруулдаг гэсэн судалгаа бий. Тиймээс хүүхдэдээ гэрийн даалгавар хийх, хичээлээс бусад ажилд оролцох цаг гаргах нь чухал гэдгийг бас бодолцож үзээрэй.

Сургууль сонгохдоо зөвхөн нэг хүчин зүйлд биш, дээрх бүх нөхцлийг харгалзан үзэх хэрэгтэй. Хамгийн чухал нь хүүхдийн тань сурах орчин, хөгжих боломж хамгийн тохиромжтой байх ёстой.

Таны хүүхдэд амжилт хүсье!